Kalaallit Nunaanni arsaannerup siunissaanik ineriartortitseqataarusuppit?
KAK ineriartornermut pissanganartumut ikaarsaariartorpoq, periusissatta nutaap atuutilersinneqarneranut atatillugu kattuffik nukittorsarneqassalluni. Taamaattumik allaffissornermut pisortamik tunniusimasumik, aaqqissuussaasumik KAK-llu ulluinnarni ingerlanneqarnerani ineriartortinneqarneranilu qitiusumik inissisimasussamik pissarsiorpugut.
Atorfik pillugu
Allaffissornermut pisortaq ulluinnarni allaffissornikkut ingerlatsinermut akisussaasuussaaq, kattuffillu suliamut ilisimasaqarluni sunniuteqarluartumillu ingerlanneqarnera qulakkiissallugu. Atorfik siulittaasumut atassuteqassaaq KAK-llu pisortaqatigiivinut, kattuffimmi pisortat allat peqatigalugit, ilaasortaassalluni.
Allaffissornermut pisortatut KAK-p ingerlaavartumik suliamut ilisimasaqarluni ingerlanneqarnissaanut ineriartortinneqarnissaanullu qitiusumik inissisimassaatit. Siulersuisut, sulisut, nunanut allanut unammisartunut sungiusaasut, klubbit ilaasortaasut kiisalu nunatsinni nunanilu tamalaani suleqatit qanimut suleqatigissavatit.
Suliassatit pingaarnerit
Allattoqarfiup ulluinnarni aqunneqarnera
Allattoqarfimmi sulisut pillugit sulisunut akisussaaneq.
Siulersuisunik pisortaqatigiinnillu sullissineq.
Siulersuisut ataatsimiinnerisa, sinniisoqarfiup ataatsimiinnerisa ataatsimiititaliallu ataatsimiinnerisa pilersaarusiorneqarnerat ataqatigiissaarneqarnerallu.
Kattuffiup allaffissornikkut suliaasa ataqatigiissaarneqarnerat suleriaatsillu pitsaasut qulakkeerneqarnissaat.
Aningaasaqarnermut aqutsineq, missingersuutinik malinnaaneq, missingersuusiorneq kiisalu avataaneersumik kukkunersiuisoq suleqatigalugu naatsorsuutinik suliaqarneq.
Aqutsilluarnerup, isumaqatigiissutinik aqutsinerup, toqqorsiveqarnerup allagaatinillu aqutsinerup qulakkeerneqarnissaat.
Arsaannermi futsalimilu Nunatsinni Pissartanngorniunnerit aaqqissuisuusut illoqarfiit sumiiffinnilu aaqqissuisut qanimut suleqatigalugit ataqatigiissaarneqarnerat.
Allattoqarfimmi sulisut peqatigalugit KAK-p klubbinik ilaasortaasunik sullissineq siunnersuinerlu.
Allattoqarfimmi sulisut peqatigalugit nuna tamakkerlugu arsaannerup futsalillu ineriartortinneqarnerannut peqataaneq.
KAK-p ataatsimiititaliaasa pilersinneqarsimasut pisortaqatigiit allat peqatigalugit ataqatigiissaarneqarnerat malinnaavigineqarnerallu.
Kommuninik, aningaasaliisartunik suleqatinillu allanik suleqatigiinnerup ataqatigiissaarneqarnera.
Kattuffiup ineriartortinneqarneranik KAK-llu periusissiaata atuutilersinneqarneranik tapersersuineq.
Illit naatsorsuutigaarput
Allaffissorneq, aqutsineq imaluunniit kattuffimmik ineriartortitsineq misilittagaqarfigigit.
Aningaasaqarnermut aqutsineq, missingersuutinik malinnaaneq naatsorsuutinillu paasinninneq misilittagaqarfigigit.
Aaqqissuussaasumik sulisinnaasutit ataatsimullu isiginnilersitsisinnaasutit.
Siulersuisut suliamut peqataalluartut pitsaasumik suleqatigineqarsinnaagit aalajangiinerillu iliuusinngortissinnaagit.
Suleqatikkuminartuusutit soqutigisaqartorpassualimmilu kattuffimmi sulinissaq nuannarisarit.
Akisussaassuseqartuusutit, aaqqiissutissanik ujartuisuusutit iliuuseqarsinnaasutillu.
Namminersortumik sulisinnaasutit nammineerlutillu suliniuteqarsinnaasutit.
Allakkatigut oqalunnikkullu pitsaasumik saqqummiussisinnaasutit.
Kalaallisut, qallunaatut tuluttullu oqaaseqarsinnaaneq iluaqutaassaaq.
Tunniussinnaasagut
Kalaallit Nunaanni timersornerup iluani aqutsisutut qitiusumik atorfik.
KAK-p ineriartortinneqarneranut annertuumik sunniuteqarnissamut periarfissaq.
Siulersuisunik pisortaqatigiinnillu qanimut suleqateqarneq.
Inuttut suliamullu tunngatillugu ineriartornissamut periarfissat pitsaasut.
Sulinermi aaqqissuussinerit eqaatsut.
Piginnaasat naapertorlugit akissarsiat.
KAK pillugu
Kalaallit Arsaattartut Kattuffiat Kalaallit Nunaanni tamarmi arsaannerup ineriartortinnissaa anguniarlugu sulivoq. Ukiuni aggersuni meeqqat inuusuttullu, klubbit ineriartortinneqarnerat, atortulersuutit, nunat tamalaat akornanni suleqatigiinneq kattuffimmillu ineriartortitsineq pillugit suliniutit annertuut ingerlanneqassapput.
Taamaattumik aqutsisumik ineriartornermi matumani peqataarusuttumik kattuffimmillu nukittuumik, nutaaliaasumik piujuartitsisumillu pilersitseqataarusuttumik pissarsiorpugut.
Atorfik pillugu apeqqutissaqaruit imaluunniit KAK aamma ineriartorneq pissanganartoq ingerlatarput paasisaqarfiginerorusukkukku, attavigisinnaavat:
Søren Høy
Niuernermut nunanullu tamalaanut pisortaq
KAK-p pisortaqatigiivinut ilaasortaq
Maili: hoy@kak.gl
Oqarasuaat: +45 21907019
Paasissutissat pingaarutillit
Suliffissaq: KAK-p Nuummi qullersaqarfia.
Atorfininnermut atatillugu sulisunut inissamik atugassiisoqassanngilaq.
Akissarsiat atorfininnermilu atugassarititaasut piginnaasat malittarisassallu atuuttut naapertorlugit isumaqatigiissutigineqassapput.
Qinnuteqarnissamut killigititaq: 1. september 2026. Qinnuteqartut ingerlaavartumik oqaloqatigineqartassapput, taamaattumillu soqutiginnittut qinnuteqaatiminnik piaartumik nassiussinissaat kaammattuutigineqarpoq.
Atorfininneq: Piaartumik imaluunniit isumaqatigiissuteqarnikkut.
Qinnuteqaat CV-lu uunga nassiunneqassapput: kenneth@kak.gl
