Suliffissamik pissanganartumik avatangiisini ineriartortuni ujartuivit?
Terminalarbejderitut ilinniagaqarpit imaluunniit timmisartoqarfimmi suliaqarnissamik soqutigisaqarpit aammalu ullut tamaasa pitsaasumik sulinissaq pingaartikkit, kiisalu silaannarissumi sulinissaq nuannarisaralugu? Taava Tasiilap heliportia sulisussarsiorpoq.
Suliassat
Suliassani assigiinngitsuni pissanganartuni peqataassaatit, ullullu tamarmik assigiinneq ajorput. Ilaatigut makku suliarisassavatit:
- Timmisartunik sullissineq – usilersuineq, usingiaaneq kiisalu timmisartunik orsersuisarneq
- Nunaqarfimmi sullissineq, soorlu aputaajaaneq il.il.
- Qatserisartutut sullissineq
- Mittarfiup illuutaanik atortuinillu aserfallatsaaliuineq
- Angallattunik nassiussanillu sullissineq
- Suliassat allat takkussuuttut
- Angalasut check in-nertillugit
Piginnaasat
Naatsorsuutigaarput 100%-imik takkuttuaannartuusutit, akisussaassuseqartutit sullissiumatuujusutillu. Taakku saniatigut suliffik piumasaqarpoq, illit:
- Kalaallisut, danskisut aammalu sapinngisamik tuluttut oqalussinnaassasutit
- Sapaatit akunnerisa naanerini sulisinnaassasutit
- Allaffissornikkut suliassanik annikinnerusunik suliaqarsinnaassasutit
- Peqqissuunissat
- Biilersinnaanermut allagartaqartutit
- Pinerlussimannginnermut uppernarsaateqartutit
Greenland Airportsip neqeroorutigaa
Suliffik pissanganartoq ineriartortoq, sulisut pitsaasunik atugassaqarnissaat pingaartinneqartoq aammalu suleqatigiinneq pitsaasoq naleqartinneqartoq. Suleqatigiit ilaanniissaatit, tamarmik namminersorlutik aammalu suleqatigiillutik sulisinnaasut.
Atorfinitsitaanermi atugassarititaasut
Atorfinitsitsineq SIK-p isumaqatigiissutaa naapertorlugu qaammammusialerluni pissaaq, ilaatigut makku ilaallutik:
- Sapaatip akunneranut akunnerit 40-t suliffiusassapput
- Piaartumik atorfininneq
Isumannaallisaanikkut akuersissut
Atorfimmut qinnuteqarnissamut piumasaqaataavoq timmisartuussinermut malittarisassat atuuttut naapertorlugit isumannaallisaanikkut akuersissummik pisinnaanissat. Taamaattumik pinerlussimannginnermut uppernarsaat ilanngullugu nassiunneqassaaq. Tamanna najukkami politeeqarfimmi pissarsiarineqarsinnaavoq.
Paasisaqarnerorusukkuit
Atorfik pillugu annertunerusumik paasisaqarusukkuit imaluunniit apeqqutissaqaruit, heliportimi pisortaq Margrethe Mikaelsen attavigisinnaavat oqarasuaatikkut + 38 43 53 imaluunniit mailikkut mhmi@airports.gl aqqutigalugu. Apeqqutit nalinginnaanerusut HR immikkoortortaqarfimmut mailikkut hr@airports.gl nassiunneqarsinnaapput.
Qinnuteqaat
Atorfimmut pillugu soqutiginnikkuit qinnuteqaatit, CV-it kiisalu ilinniarsimanermut uppernarsaatit ataani linki aqqutigalugu ulloq 5. juni. 2026 nallertinnagu nassiunneqassapput.
Malugeqquneqarpoq qinnuteqaatit mailikkut tiguneq ajoratsigit.
