Klubbit nukittorsarnissaannut Kalaallit Nunaannilu arsaannerup ineriartortinnissaanut peqataarusuppit?
Kalaallit Arsaattartut Kattuffiat (KAK) klubbinut ineriartortitsinermullu siunnersortimik tunniusimasumik aaqqissuussillaqqissumillu pissarsiorpoq. Klubbit qanimut suleqatiginissaat Kalaallit Nunaannilu arsaannerup ineriartortinneqarneranut peqataanissaq soqutigisarissavat.
KAK ineriartortitsivoq, ilaatigut klubbinut sullissinerput nukittorsarusupparput, klubbit KAK-mut qaninnerusumik attaveqarsinnaaqqullugit ulluinnarnilu sulinerminni ineriartornerminnilu pitsaanerusumik tapersersorneqarsinnaaqqullugit. Klubbinut ineriartortitsinermullu siunnersortitut KAK-p allattoqarfiani pingaarutilimmik inissisimassaatit. Klubbinut sullissineq, allaffissorneq ataqatigiissaarinerlu suliarisassavatit, kiisalu suliniutinik sammisassanillu minnerusunik isumassarsiamit naammassinninnermut nammineerlutit ingerlatsinissamut akisussaaffeqassallutit.
Ulluinnarni suliassat assigiinngiiaassapput. Aaqqissuussillaqqissuseq, suleqatigiinneq suliassanillu naammassinnittarneq arsaannermik soqutigisaqarnermut naligiimmik pingaaruteqarput.
Klubbinut sullissineq sulianni pingaaruteqartassaaq
KAK-p klubbinut aalajangersimasumik attaveqaataasa ilagissavaatsit, Kalaallit Nunaannilu klubbinut sullissinerup ineriartortinnissaanut nukittorsarnissaanullu peqataassallutit.
klubbit ingerlaavartumik attaveqarfigisassavatit oqaloqatigisassallugillu
klubbit allaffissornikkut ulluinnarnilu suliassatigut ikiorlugit
ilaasortanik nalunaarsuineq klubbinullu paasissutissat malinnaavigalugit
klubbinut tikeraarnerit klubbinillu ineriartortitsinerit pilersaarusiorlugit ataqatigiissarlugillu
klubbit aaqqissuussaanikkut, ingerlatsinikkut suleriaatsitigullu ikiorlugit
klubbit suleqatigalugit sungiusaasunut arsaanermilu aqutsisunut (dommerinut) pikkorissarnerit ataqatigiissarlugit
isumaqatigiissutit, sammisassat piffissaliussallu malinnaavigalugit
klubbit pisariaqartitaat kissaataallu katersorlugit, KAK-p klubbinut tapersersuisinnaanera suli pitsaanerulersinniarlugu.
Akissutit tamaasa nammineq ilisimassallugit pisariaqanngilaq. Pingaarnerpaavoq akisussaaffimmik tigusisinnaanissat, eqqortumik ikiorneqarnissaq nassaarisinnaanissat aammalu suliassat saaffiginnissutillu naammassineqarnissaat qulakkeersinnaanissaat.
Suliniutit, sammisassat aningaasaqarnerlu
Atorfimmi aamma pingaaruteqarpoq suliniutinik sammisassanillu minnerusunik nammineerlutit akisussaaffigisinnaanissat. Assersuutigalugu klubbinik ineriartortitsineq, pikkorissarneq, arsaannermik atuarfik, aaqqissuussineq minnerusoq imaluunniit ineriartortitsinermut sammisassaq allat sakisussaaffigalugit. Suliassaq tamakkerlugu akisussaaffigissavat - pilersaarusiornermit ataqatigiissaarinermut, piviusunngortitsinermut, aningaasaqarnermut kiisalu kingorna malitseqartitsinermut.
pikkorissarnernik, arsaannermik atuarfinnik, unammiuaarnernik sammisassanillu pilersaarusiorneq ataqatigiissaarinerlu
nunanut allanut unammisartunut angalanernullu atatillugu ulluinnarni aaqqissuussineq
suliniutinut minnerusunut pilersaarusiorneq malitseqartitsinerlu
klubbinut, ilinniartitsisunut suleqatinullu attaveqarneq
suliniutinut minnerusunut missingersuusiorneq aningaasaqarnikkullu malitseqartitsineq
bilaginik, fakturanik uppernarsaatinillu KAK-p allaffissornera suleqatigalugu suliaqarneq
sammisassanik suliniutinillu nalunaarusiorneq
ulluinnarni allaffissorneq, e-mailit saaffiginnissutillu
attaveqaqatigiinneq inunnillu attaveqaatit (sociale medier) akisussaasut suleqatigalugit
nioqqutissat (merchandise) toqqorsivimmillu ingerlatsineq
allattoqarfimmi allaffissornikkut ulluinnarnilu suliassat allat.
Kinaana ujaripput?
Inummik ataatsimut isiginnissinnaasumik, suliassallu assigiinngiiaartut akornanni aaqqissuussaasumik sulisinnaasumik ujartuivugut. Allaffissornermut attuumassuteqartumik ilinniagaqarsimanissat imaluunniit allaffissornikkut misilittagaqarnissat naatsorsuutigaarput. Peqatigiiffimmi, suliffeqarfimmi, kattuffimmi assigisaaniluunniit misilittagaqarneq iluaqutaassaaq.
aaqqissuussillaqqissuussaatit suliassallu arlallit ataatsikkut malinnaavigisinnaassallugit
pilersaarusiornermut, ataqatigiissaarinermut suliassanillu naammassinninnissamut pikkorissuussaatit
nammineerlutit sulisinnaassaatit suliassanullu nammineq akisussaaffigisannut suliniutinullu minnerusunut akisussaaffimmik tigusisinnaassallutit
aningaasaqarnermik pitsaasumik paasisimasaqassaatit, missingersuutinik minnerusunik, bilaginik, fakturanik aningaasaqarnikkullu malitseqartitsinermik suliaqarsinnaassallutit
sullissiumatuujussaatit inunnillu assigiinngitsunik suleqateqarsinnaassallutit
suleqatigiit ikittunnguit akornanni sulisinnaassaatit, suliassanillu assigiinngitsunik ikioqatigiinnissamut piareersimassallutit
Microsoft Office-mik nalinginnaasunillu allaffissornermut systeminik atuisinnaassaatit
timersornermik, ajornanngippat arsaannermik, soqutigisaqassaatit
kalaallisut danskisullu attaveqarsinnaassaatit - kalaallisut piginnaasaqarneq annertuumik iluaqutaassaaq
sulisinnaaninni eqaatsuussaatit, sammisassat ilaat nalinginnaasumik suliffiup avataatigut ingerlanneqarsinnaammata.
Arsaannermut imaluunniit aningaasaqarnermut immikkut ilisimasalittut aallartinnissaat pisariaqanngilaq. Pingaarnerpaavoq akisussaaffimmik tigusisinnaanissat, aaqqissuussaasumik sulisinnaanissat, ilinniarusussuseqarnissat pilersaarutillu piviusunngortissinnaanissaat.
Tunniussinnaasagut
KAK-mi Kalaallit Nunaanni arsaannerup ineriartortinneqarneranut qanimut peqataassaatit, klubbinullu nunarput tamakkerlugu arsaannermik pilersitsillutillu ingerlatsitsisunut iluaqutaasinnaassallutit.
Allattoqarfimmi suleqatigiit ikittunnguit akornanni sulissaatit, klubbinut, kajumissutsiminnik sulisunut, sungiusaasunut, arsaattartunut, kommuninut Kalaallit Nunaannilu nunanilu allani suleqatinut attaveqarluassallutit. Ulluinnarni suliassat assigiinngiiaassapput, nammineerlutillu suliassanik suliniutinillu minnerusunik ingerlatsinissamut akisussaaffeqarlutillu periarfissaqassaatit, KAK-p ataatsimut ineriartortinneqarneranut peqataaninni. Suliamut inuttullu ineriartornissamut periarfissaqassaaq.
Akissarsiat piginnaasat isumaqatigiissullu naapertorlugit aalajangersarneqassapput.
KAK pillugu
Kalaallit Arsaattartut Kattuffiat (KAK) Kalaallit Nunaanni arsaannermut immikkut kattuffiuvoq.
KAK meeqqat inuusuttullu, klubbit nukittorsarnissaat, sungiusaasunik arsaanermilu aqutsisunik (dommerinik) ilinniartitsineq, futsal, unammiuaarnerit, nunanut allanut unammisartut nunanilu tamalaani suleqatigiinnerit pillugit arsaannermik ineriartortitsinermik suliaqarpoq.
Periusissiarput tassaavoq:
“Arsaqatigiitta - Fællesskab gennem fodbolden. Hele året - hele landet.”
Anguniagaraarput Kalaallit Nunaanni sumi najugaqarneq apeqqutaatinnagu arsaannissamut ataatsimoornermullu peqataarnissamut periarfissat suli pitsaanerulersinnissaat.
Atorfik pillugu
Atorfik sapaatip akunneranut agguaqatigiissillugu 40 tiiminik suliffiuvoq, Nuummi inissisimalluni.
Sulilerfissaq: Piaarnerpaamik imaluunniit isumaqatigiissuteqarnikkut
Qinnuteqarnissamut killigititaq: 30. september 2026
Qinnuteqaatit CV-lu toqqaannartumik uunga nassiunneqassapput:
Søren Høy
E-mail: hoy@kak.gl
Oqarasuaat: +45 21 29 70 19
Qinnuteqaatit naleqquttut tigunerini atorfinitsitsinissamut oqaloqatiginninnerit ingerlaavartumik ingerlattassavagut. Taamaattumik qinnuteqarnissamut killigititaq nallertinnagu atorfik inuttalerneqarsinnaavoq, qinnuteqaatillu piaartumik nassiunnissaa kaammattuutigaarput.
