Sumiiffiit
Qaqortoq
Nunanut tamalaanut pissanganartumik avatangiiseqarluartumi, siunissamilu periarfissarpassuarnik neqerooruteqartumi suleqataalernissamut soqutiginnippit? Qaqortup Mittarfiani security-mi suleqataasinnaanerit takorloorsinnaaviuk?
Taava Qaqortumi mittarfittaami securityp immikkoortortaqarfiani atorfiit ilaannut qinnuteqarit.
Mittarfimmi isumannaallisaaneq tamatigut pingaartinneqartuuvoq, Greenland Airports-imilu security-mi sulisut nammineerluta nunani tamalaani malittarisassat piumasaqaatillu sakkortunerpaat naapertorlugit ilinniartittarpavut.
Suliffinni pingaarnerpaatut mittarfiit, timmisartut ilaasullu isumannaatsuunissaannut peqataassaatit.
Securitymedarbejderitut eqqummaarissuussaatit. Scannerimik atortoqarluni misissuinermi pigisat pasinartut ilisarisinnaassavatit, kiisalu nakkutiginninnermi suliassat peqataaffigissallugit.
Ilinniarnermi suna ilinniassaviuk?
Security-mut tunngasut tamakkiisumik sukumiisumik ilinniarneqassapput, ilaatigut:
- Nassiussanik bagaginillu tigusineq scannerinerlu
- Ilaasunik misissuinermi tigusiffiginninneq
- Mittarfiup immikkoortuini assigiinngitsuni isersinnaanermut nakkutilliineq
- Nakkutilliineq aamma misissuilluni angalaarneq
- Scannerini pigisanik pasinartunik ilisarsineq
- Oqartussaasunik, soorlu politiinik, akileraartarnermut oqartussanik aamma Angallannermut Aqutsisoqarfimmik suleqatiginninneq
Isumannaallisaaneq pillugu aaqqissuussamut nukittuumut ilanngutissaatit, kiisalu pissutsini eqqoqqissaarnissaq, ataatsimut isiginnissinnaaneq eqqissisimasuunissarlu pingaaruteqartutigut sunniuteqarluartumik sulisarnissaq ilinniassallugu.
Kinaavit?
Ujartorparput illit, kajumissuseqartutit, paasisassarsiorusussuseqartutit kiisalu suliassaqarfimmi sukkasuumik ineriartortumi imminut ineriartortikkusuttutit. Suliffiup annersaa tassaavoq piginnaasatit nutartertuarnissaat – malittarisassat nutaat teknologilu nutaaq eqqarsaatigalugit. Aamma suliffiup piffissai allanngorarsinnaasut piareersimaffigissavatit, ulapaarfiusunilu ataatsimut isiginnissinnaanissat attatiinnarsinnaallugu.
Naatsorsuutigaarput:
- Politiinit isumannaallisaanermut akuersissutigineqarsinnaasutit
- Sulilernermut atatillugu ilisarititsinermut pikkorissarnermut peqataassasutit
- Ikinnerpaamik oqaatsit marluk atorsinnaagitit, soorlu kalaallisut, qallunaatut, tuluttut imaluunniit allamik
- Biilersinnaanermut allagartaqartutit
- Ilinniarusussuseqartutit, akisussaassuseqartutit aamma immikkoortunut mikisunut eqqumaffiginnittuusutit
- Ilinniagaqarsimanissat kissaatigaarput, piumasaqaataanngilarli
- Inussiarnersuusutit sullissiumatuujullutillu
Ilinniarnermut tunngasut
Ilinniartitaaneq ilaatigut Politiit aamma Akileraartarnermut Oqartussaasut suleqatigalugit ingerlanneqassaaq, kiisalu Angallannermut Aqutsisoqarfiup piumasaqaatai atuuttut tamarmik malinneqassallutik.
Aamma periarfissaqarpoq ingerlaavartumik ilinniarnissamut aammalu security-mut tunngasunik immikkut ittunik pikkorissarnissamut, taamaalillutit sulinerni piginnaasatit ineriartortittuarsinnaavatit.
Neqeroorutigaarput
- Ilinniarneq naammassereerpat suliffissamik qulakkeerinninneq
- Isumaqatigiissutit atuuttut naapertorlugit atorfinitsitsineq
- Suliffik ammasoq, qiimasoq suleqatillu pitsaasut
- Suliffeqarfik sulisunut toqqissisimanermik isumannaallisaanermillu pingaartitsisoq
- Inuttut suliamullu tunngasutigut ineriartortitsinissamut periarfissaq suliffeqarfimmi ineriartortuartumi
Isumannaallisaanermut akuersissut
Atorfimmut eqqarsaatigineqassaguit piumasaqaataavoq Kalaallit Nunaanni Sinniisoqarfimmit isumannaallisaanermut akuersissutigineqarsinnaasutit. Qinnuteqaat atorfinitsinneqarnermi suliarineqassaaq.
Atorfimmut eqqarsaatigineqassaguit qinnuteqaammut ilanngullugu pinerlussimannginnermut uppernarsaat ilanngutissavat. Taanna najukkanni politiinit pissarsiarineqarsinnaavoq imaluunniit www.sullissivik.gl aqqutigalugu pissarsiarineqarsinnaalluni.
Atorfik pillugu paasissutissanik amerlanerusunik paasisaqarusukkuit Securityleder Thomas Henriksen attaveqarfigiuk uunga:
– Mail: tghe@airports.gl
– Tlf.: +299 275699
Paasissutissat nalinginnaanerusut pillugit HR-afdeling-imut apeqqutigineqarsinnaapput uunga: hr@airports.gl
Soqutiginnippit?
Security-team-imut ilanngukkusukkuit qinnuteqaatit, CV aamma uppernarsaatit attuumassuteqartut ataani linki aqqutigalugu nassiutissavatit, kingusinnerpaamik ulloq 11. September 2026.
Atorfiniffissap ullua 12. Oktober .2026
