TIMERSOQATIGIIT KATTUFFIAT
Suliniummut Ataatsimoorluta Aalasa 2-mut suliniummut suleqataasoq
Timersornermi avatangiisinik toqqissisimanartunik, peqqinnartunik peqataatitsisunilu pilersitsinissamut ataatsimoorussamik suliniuteqarnermi ingerlaqqinneq.
Suliniut pillugu
Ataatsimoorluta Aalasa 2 tassaavoq suliniutip Ataatsimoorluta Aalasa-p siammasissumik ingerlateqqinnera, tassani Timersoqatigiit Kattuffiat (GIF), UNICEF Kalaallit Nunaanni, Paarisa aamma Innuttaasut Peqqissusiannik Ilisimatusarfik suleqatigiillutik timersoqatigiiffinni meeqqanut tunngatillugu toqqissisimanermik, atugarissaarnermik peqataatitsinerlu pitsanngorsarniarlugit suliniutaat.
Suliniut oktober 2026-miit september 2030-mut ingerlanneqassaaq. Suliniummi siunertaavoq meeqqat amerlanerusut Kalaallit Nunaanni toqqissisimanartumik peqataatitsisumillu timersornikkut inuiaqatigiinnut ilaalernissaat, meeqqat pisinnaatitaaffii tunngavigalugit.
Suliniutip pingaarnertut anguniagai
- Ataatsimoorluta Aalasa-mi suliniutit pitsaasut ingerlateqqillugit meeqqanut amerlanerusunut timersornermi avatangiisit toqqissisimanartut, peqqissut peqataatitsisullu pilersissallugit
- Suliniutip inerneri sakkussatullu inerisarneqarsimasut GIF-imi, timersoqatigiiffinni, kattuffinni aammalu inuiaqatigiinni atuutilerneqarnissaat qulakkiissallugu
- Angajoqqaanik nakkutiginnittunillu suleqateqarnerup nukittorsarneratigut timersornerup iluani nukinnik atuinissamut periarfissallit amerlanerit pilersinnissai
Atorfik pillugu
GIF-imi suliniummut suleqataasutut Ataatsimoorluta Aalasa 2-mi pingaarutilimmik inissisimassaatit. GIF-ip allattoqarfiani Nuummi inissisimassaatit aammalu toqqaannartumik GIF-imi pisortamut nalunaaruteqartassallutit. Atorfik suliniutip ingerlanissaanut piffissaliussaq tamakkerlugu atuuppoq, tassa oktober 2026-miit september 2030-mut, qaammatillu 3-6-t akornanni sivitsorneqarsinnaalluni naammassinninnermi aaqqissuussinerup naggataa tikillugu.
Atorfik Kalaallit Nunaanni illoqarfinnut nunaqarfinnullu piffissap ilaanni angalanertaqassaaq, najukkat tikillugit oqaloqatiginninnerit pikkorissaanerillu suliniummi pingaarnerpaartaanut ilaammata.
Suliassat akisussaaffiillu pingaarnerit
Suliniummi ineriartortitsineq piviusunngortitsinerlu
- Ataatsimoorluta Aalasa 2-p immikkoortui pingaarnerit sisamat uku pilersaarusiorlugit: atortussanik inerisaaneq, timersoqatigiiffinnut atortut atuutilernissaat qulakkeerlugu suliaqarneq, atortut sungiusaasunut, angajoqqaanut akisussaasunullu siammarternissai
- Workshopinut atortussat, ilinniartitsinermi modulinik digitalinillu sakkunik ineriartortitsineq naleqqussaanerlu, ilanngullugit e-portal aamma digitalimik ilinniarfissaq (ataatsimoorluta.gif.gl)
- Anguniakkanut piffissalersuinernullu naapertuuttumik ingerlaavartumillu malinnaaneq uppernarsaasersuinerlu
Najukkani ingerlatsinerit pikkorissarnerillu
- Illoqarfinni nunaqarfinnilu toqqarneqartuni workshopinik, meeqqanut aaqqissuussinernik patajaallisaaffiusunillu ingerlatsinerit pilersaarusiornerillu
- Timersoqatigiiffiit siulersuisui, sungiusaasut, angajoqqaat meeqqallu peqataatinnerat
- Timersoqatigiiffinnik sungiusaasunillu nutaanik suliniummut peqataasussanik kajumissaarineq
Patajaallisaaneq attaveqarnerlu
- Suliniutip GIF-ip ukiumoortumik pilersaarutaanut aaqqissuussaanullu ilanngunneqarnissaa.
- Timersoqatigiiffiit meeqqanut naleqquttumik timersoqatigiiffittut uppernarsarneqarnissaannik tapersersuineq.
- Kommunit suleqatigalugit tunngavissat patajaatsut pilersitseqataaffigalugit.
- Suliniutip inerneri digitalikkut attaveqatigiinnermi tusagassiuutillu aqqutigalugit saqqummiunneqartarnissaat.
Nalilersuineq ilisimasanillu avitseqatigiinneq
- Suliniutip ingerlasarnera nalilersuiuarneq ataavartumillu ukiumut nalunaarusiorneq.
- Ukiumoortumik killiffik pillugu nalunaarusianut peqataaneq kiisalu suliniutip qiteqqunnerani naggataatigullu nalilersuinerni suleqataaneq.
- GIF-imi, kattuffinni kiisalu suleqatit allat akornanni ilisimasanik avitseqatigiinneq.
Ilinniaqassutsikkut tunuliaqutaq
Naatsorsuutigaarput ilinniarsimasatit ilaatigut ukuusut:
- Suliniummik aqutsineq imaluunniit ataqatigiissaarineq.
- Perorsaanermik, isumaginninnermik, innuttaasut peqqissusiannik imaluunniit assingusumik ilinniagaqarneq.
- Attaveqaqatigiinneq, paasissutissiineq imaluunniit meeqqat peqatigiiffiillu pillugit ilisimasaqarnermik tunngavilik ilisimasaqarneq.
Kalaallit Nunaanni timersornermik imaluunniit peqatigiiffinnik suliaqarnermik misilittagaqarneq iluaqutaassaaq, piumasaqaataanngilarli.
Inuttut piginnaasat
- Nammineersinnaalluartuuvutit suliniuteqarsinnaassuseqarluarlutillu.
- Suleqatigiit assigiinngitsunik tunuliaqutillit akornanni suleqatigiinnermik nuannarisaqartuuvutit.
- Inunnik attaveqarluarsinnaavutit kajumissaarillutillu.
- Aaqqissuussaasumik siunnerfilimmillu sulisinnaavutit.
- Kalaallisut danskisullu oqalussinnaallutillu allassinnaavutit.
- Meeqqat pisinnaatitaaffiinik atugarissaarnerannillu soqutiginnittuuvutit.
- Kalaallit Nunaanni angalasarnissamut assigiinngitsunillu avatangiiseqartuni sulisarnissamut piareersimavutit.
Neqeroorutigaarput
- Meeqqat atugarissaarnerannut timersornermilu periarfissaannut sunniuteqarluarnissamut periarfissaq pitsaasoq.
- UNICEF Kalaallit Nunaanni, Paarisa aammalu Innuttaasut Peqqissusiannik Ilisimatusarfik qanimut suleqatigisinnaassavatit.
- Nuummi GIF-ip allattoqarfiani suleqatit tunniusimasut akornanni suliffik.
- Assigiinnitsunik ilinniagaqarsimasut akornanni ataavartumik avitseqatigiinneq tapersersoqatigiinnerlu, kiisalu nuna tamakkerlugu suliniummi peqataaneq.
- Akissarsiat atorfininnermilu atugassarititaasut immikkut isumaqatigiissutigineqassapput.
Paasissutissat
Sulilernissaq: 1. oktober 2026 imaluunniit isumaqatigiissuteqarnikkut.
Suliffik: GIF-ip allattoqarfia, Nuuk.
Atorfininneq: Ukiunik sisamanik killilikkamik atorfeqarneq, qaammatillu 3-6-t akornanni sivitsorneqarsinnaalluni.
Atorfimmut atasumik inissaqartitsisoqanngilaq.
Qinnuteqaat
Qinnuteqaat, CV kiisalu ilinniarsimanermit uppernarsaatit attuumassuteqartut ilanngullugit nassiunneqassapput Timersoqatigiit Kattuffiannut kingusinnerpaamik 24. august 2026.
E-mail: stilling@gif.gl
Atorfik pillugu apeqqutissaqaruit, pisortaq Jonas Jensen, jonas@gif.gl imaluunniit oqarasuaat 34 81 51 attavigisinnaavat.
Timersoqatigiit Kattuffiat pillugu
Timersoqatigiit Kattuffiat (GIF) 11.000-it missaannik ilaasortalik kattuffiuvoq kattuffinnik qulingiluanik timersoqatigiiffinnillu kattuffeqanngitsunik 19-inik ilaasortalik.
Timersoqatigiit Kattuffiata takorluugaraa 2030-mi Kalaallit Nunaat nunarsuarmi timimik aalatitsinerpaanngornissaa. Nalunngilarput timip aalatinnerata timikkut eqqarsartaatsikkullu peqqissutsitsinnut qanoq pingaaruteqartiginera, aamma siunertaraarput innuttaasut tamarmik timimik aalatinneratigut atugarissaarnerunissaat. Tamanna angusinnaavarput nuannaarneq toqqissisimanerlu, ataqatigiinnerit nukittuut naleqartullu ukkatarinerisigut.
Timersoqatigiit Kattuffiat pillugu www.gif.gl | Suliniut pillugu paasissutissat: ataatsimoorluta.gif.gl
