Sumiiffiit
Ilulissat
Mittarfik Ilulissat Facility-mi immikkoortortami akisussaassuseqarluartumik sullissisussarsiorpoq
Akisussaassuseqarpit sullissilluarsinnaallutillu? Kalaallit Nunaanni nunani tamalaani mittarfiup tulliata ammarnissaanut peqataarusuppit? Facility-mut immikkoortortaqarfitsinnut sullissisumik (Servicemedarbejder) pikkorissumik ujartuivugut, ullut tamaasa ingerlatsinermut illuutinillu aserfallatsaaliuinermut pingaarutilimmik suleqataasussamik, taakkumi nunani tamalaani mittarfimmik ingerlatsinermut pingaaruteqarluinnarput.
Atorfik pillugu:
Facility-mi immikkoortortami suleqatigiit ilaattut illuutit isumannaatsuunissaat atorluarneqarnissaallu qulakkeeqataaffigissavat, suleqatillu tunniusimasut pikkorissut kiisalu suleqatigiilluartut qanillugit suleqatigalugit.
Facility-mi immikkoortortami sulisut ilaannikkut mittarfiup security-anut tunngasunik aamma peqataasarput. Security-mut suliassat immikkut ittut pillugit ilinniartinneqassaatit, aammalu nunani tamalaani timmisartuussinerit nalaanni suliassanik ingerlatsinermi peqataasassallutit.
Suliassat pingaarnerit:
- Illuutinik aserfallatsaaliuineq
- Eqqiaaneq
- Aputaajaaneq
- Sulisunik ingerlaassineq
Piginnaasatit naatsorsuutigisavut
- Pinerlussimannginnermut allagartaq (ren straffeattest)
- Oqartussanit ukiut kingulliit 10-it tunngavigalugit isumannaallisaanermut akuersissummik pissarsisinnaaneq
- Biilernermut allagartaq kategori B
- Piffissani nikerartuni, sapaatit akunnerisa naanerini nalliuttunilu sulisinnaaneq
- Torersuunissamik pingaartitsineq sullissilluarnissamillu isiginnittaaseq
- Namminersorluni sulisinnaaneq akisussaaffimmillu tigusisinnaaneq
- Oqaatsitigut piginnaasaqarnissaq – tuluttut kiisalu kalaallisut aamma/imaluunniit danskisut
Atorfimmi atorfininnissannut piumasaqaataavoq oqartussanit ukiut kingulliit 10-it tunngavigalugit isumannaallisaanermut akuersissummik pissarsisinnaanissat, aammalu taanna atorfinitsitaanerpit nalaani tamakkerlugu attatiinnarsinnaassagit.
Neqeroorutigaavut:
- Nunani tamalaani mittarfimmi suliffik pissanganartoq assigiinngisitaartorlu
- Akissarsiat piginnaasat naapertorlugit
- Suliamut tunngatillugu ineriartornissamut ilinniaqqinnissamullu periarfissagissaarneq
- Suleqatigiit suleqatigiilluartut piginnaasaqarluartullu
Qinnuteqaat:
Akisussaaffimmik avatangiisini pissanganartuni sulerusuppit?
Atorfik pillugu annertunerusumik paasisaqarusukkuit Facility Manager Sam Grønvold attaveqarfigisinnaavat e-mailikkut samg@airports.gl.
Qinnuteqaatit linki ataaniittoq aqqutigalugu nassiunneqassapput kingusinnerpaamik 28. juli 2026.
Qinnuteqaativit tigunissaa qilanaaraarput!
